البداية من هنا...

مش عارف ليه دايماً مش حابب البلوجسبوت... بس أهو هحاول، يمكن في يوم أفتح مدونة في حتة تانية تديني إمكانيات أكتر.

نبتدي من معنى الاسم... Übermensch

هي كلمة ألمانية، وكعادة اللغة الألمانية، بيجيبوا كلمتين ويلزقوهم في بعض فتطلع كلمة واحدة، أحياناً الإنجليزية بتعمل كده، بس ده حصل مؤخراً بس للاستسهال. على أية حال، الكلمة من كلمتين زي ما قلت وهما كلمتي Über ومعناها فوق، وكلمة Mensch ومعناها رجل أو إنسان. الكلمة على بعضها يعني فوق الإنسان أو الإنسان السوبر، وهي فكرة من الفيلسوف الألماني فريدريك نيتشه عن الهدف اللي المفروض تحطه الإنسانية لنفسها لتتقدم. وذكرها في كتابه "هكذا تكلم زراديشت". 

مش هتكلم كتير عن الكلمة في فكر نيتشه، لكن في فكري الشخصي هو إن الكلمة تعني إننا قاربنا دخول مرحلة ما بعد الإنسانية، ودي المرحلة اللي تزول فيها الحدود والمسافات ونجتمع كلنا لاتخاذ قرار واحد وهو حفظ النوع وانتشاره... بالظبط زي مشروع الإنسان Human Project اللي هنشر عنه فيديو في بوست لاحق.

ممكن نتقدم، وننتشر في المجرة، لو وضعنا عقولنا في هذا الأمر، أو ممكن ننتهي بقتل نفسنا وتدمير أنفسنا وتخريب كوكبنا وانهاء جنسنا بناءً على كراهيتنا لبعضنا البعض بسبب الدين أو اللون أو الجنس أو أي مبرر آخر يستخدمه القاتل ليقتل! 

على أية الحال، المدونة دي هتكون محطة أترجم فيها المقالات اللي بحبها، وأعمل شير للفيديوهات اللي بحبها من على اليوتيوب سواء ترجمتها بنفسي أو ترجمها آخرون. 

المهم أن نستمتع جميعنا بالعلم وما يقدمه لخدمة البشر بكافة أديانهم وألوانهم وأجناسهم، لأننا في النهاية - سواء اتفقنا أو اختلفنا - جميعنا لينا أصل واحد، ولينا مصير واحد...